بەکارھێنانی سەرلەنوێی توندوتیژی لە خۆپیشاندانەکانی سلێمانی و ناوچەکانی تری کوردوستاندا، شەھیدکردنی چەند گەنجێک و بریندارکردنی ژمارەیەکی زۆرتر و فڕاندنی چەند چالەکەوانێک، گۆڕانێکی چاوەڕواننەکراوە و مایەی خەمبارییەکی گەورەیە. ھەموومان ئەو ھەستەمان لا دروستبووبوو کە قۆناغی پەنابردن بۆ توندوتیژی و فڕاندن و تەقەکردن لە خۆپیشاندەران کۆتایی پێھاتووە، ھەم خۆپیشاندەران و ھەم ھێزە سەربازییەکان پێیانناوەتە قۆناغێکی تازەوە. ھاوکات چاوەڕوانی ئەوەدەکرا دەسەڵاتداران بە بەرنامەی ئاشکراو قابیلی قبووڵکردنەوە بێنەقسە و ھەوڵێکی شێلگیرانە نیشنابدەن بۆ چارەسەرکردنی قەیرانە قووڵەکانی ئەمڕۆکەی کوردوستان
بەڵام ڕووداوەکانی ئەم دوو ڕۆژەی دوایی ئەوەمان نیشانئەدات تا ئێستاش ھێزگەلێک ھەن لەوە تێنەگەیشتوون کە بەکارھێانی توندوتیژی ھەڵەترین وەڵامە بەم شەپۆلی ناڕەزاییە بدرێتەوە. لەھیچ شوێنێکی دوینادا فشار و ترساندن و توندوتیژی بۆینەکراوە خەڵک ناچارکات دونیایەیک قبووڵبکات کە قابیلی قبووڵکردن نییە. ئەوەتا دەبینین ڕۆژانە سنووری ناڕەزاییەکان فراوانتردەبێت و تادێت ھێز و توێژ و کەرتی کۆمەڵایەتی نوێ دەچنە پاڵ ئەم جوڵە گەورەیەی دونیای ئێمە. ھاوکاتیش تا دێت داواکاری و خواستی ناڕەزاییەکان قوڵتر و فەراوانتر دەبن. ئەو شارانەشی کە تا ئێستا بەشێک نین لەم بزوتنەوەیە ڕۆژانە نەفەسی بزوتنەوەکە ھەڵدەمژن و درەنگ یان زوو دێنە قسە
سەرنجێکی خێرا لە ھەوڵێستی ھێزە سیاسییەکانی کوردوستان ئەوەمان پێدەڵێت کە ھێزی ھەرە غائیب لەم ساتەدا یەکێتی نیشتیمانی کوردوستانە، ئەگەرچی زۆربەی ھەرەزۆری خۆپیشاندانەکان لەو شوێنانەدا ڕوودەدەن کە بە ڕەسمی شوێنی دەسەڵاتدارێتی یەکێتین. یەکێتی تا ئەم ساتە ھەڵوێستێکی ئاشکرای بەرامبەر بەو ڕووداوە گەورانە نییە کە لەبەردەمیدا ڕوودەدەن، ئەمە لەکاتێکدایە بڕێکی بەرچاو لە ئەندام و ھەوادارانی یەکێتی لەناو بزوتنەوەکەدان، کەچی یەکێتی خۆی وەک حیزب و وەک ھەڵوێستی ڕەسمی غائیبی ژمارە یەکە. ھاوکات ھەموو ھێزەکانی تری کوردوستان دەزانن چیدەکەن و چ ھەڵوێستێکیان ھەیە. پارتی بۆ نموونە بە ئاشکرایی و بە عەمەلی دوژمنایەتییەکی گەورەی ئەم شەپۆلی ناڕەزایەتییە دەکات، ھەموو ڕێگەیەکیشی گرتۆتەبەر بۆئەوەی نەھێڵێت ناڕەزاییەکان بۆ ھەولێر و ناوچەکانی تری ژێردەسەڵاتی بپەڕێتەوە. ھێزە ئۆپۆزیسیۆنەکان بەدەیان شێوەی ڕەسمی و ناڕسمی چوونەتە پاڵ ناڕەزایەتییەکان، کەچی یەکێتی نیشتیمانی بێدەنگ و بێھەڵوێست و بێبڕیار ماوەتەوە. پێدەچێت یەکێتی تا ئێستاش دەسەتی بە حوکمەتێکەوە گرتبێت کە بەعەمەلی و لەسەر ئەرزی واقیع بوونی نەماوە. ئەوەی چاوی خۆی نەنووقێنێت بە ئاشکرا دەبینێت ئەمڕۆ لە کوردوستاندا شتێک بەناوی ”حکومەتی ھەرێم”ەوە نەماوە. بەڕادەیەک لە شارێکی وەک ھەولێردا حوکمەت لەسەر زاری وەزیری خوێندنی باڵەوە باس لە بەردەوامی دەوامی زانکۆ و پەیمانگەکان لە ھەولێردا دەکات، کەچی یەکێتی قوتابیانی پارتی لەلای خۆیەوە بڕیاری داخستنی زانکۆکان جبەجێدەکات و خوێنداکاران بۆ ناو ماڵەکانی خۆیان دەنێرێتەوە. ئەم دۆخەش تەنھا یەک دەلالەتی ھەیە: شتێک بەناوی حکومەتی ھەرێمەوە لە کوردوستاندا بوونی نەماوە و ئەم حکومەتە بە عەمەلی ھەڵوەشاوەتەوە. ئاخر کێ لە ھەولێردا بڕیارەکان دەردەکات، یەکێتی قوتابیانی پارتی یان حکومەتی ھەرێم و وەزیرەکانی
بێدەنگی یەکێتی دۆخکەی ئاڵۆزتر و ێگەی گەیشتن بە دۆزینەوەی چارەسەرێکی ڕاستەقینەی زەحمەتترکردوە. یەکێتی یان ئەوەتا دەچێتە پاڵ پارتی و دژایەتی ناڕەزاییەتییەکان دەکات، یان ئەوەتا ھەنگاوێک لە پارتی دووردەکەوێتەوە و دێتە پاڵ ناڕەزاییەکان. ھەموو گۆڕانێک لە ھەڵوێستی یەکێتیدا بەرەکان ئاشکراتر دەکات و بەمەش ئەگەری سیاسی نوێ لە کوردوستاندا دێنێتەکایەوە. ھیواداری یەکێتی لەوە زیاتر بێدەنگ نەبێت و بڕیاری ئەوەبدات بپەڕێتەوە بۆ بەرەی گوێگران لە داخوازی ناڕەزاییەکان. ناڕۆشنی لە ھەڵوێستی یەکێتیدا بڕ و ڕادەی توندوتیژییەکانی لەناوچەی سلێمانیدا گەورەکردوە.
مەریوان وریا قانیع
٢٦-٢-٢٠١١
مەریوان وریا قانیع
٢٦-٢-٢٠١١
No comments:
Post a Comment